Славниот фудбалски тренер и поранешен селектор на хрватската репрезентација, Мирослав „Чиро“ Блажевиќ почина утринава.
Блажевиќ од 2011 година се бореше со рак, двапати го победи, но третиот пат за жал не успеа. Почина два дена пред својот 88. роденден.
Мирослав Блажевиќ е роден во 1935 година во Травник, Босна и Херцеговина, и е босански Хрват. Беше фудбалер, десно крило, а кариерата ја започна во локалниот Травник. Сепак, сениорската кариера ја почна во загрепски Динамо, играше и за Локомотива, Сарајево, Ријека, швајцарските Сион и Мутје. Играчката кариера ја заврши на 31 година, а набрзо потоа заплива во тренерските води.
Во 1982 година на Динамо му ја донесе титулата шампион на Југославија, наредната година и Купот на Маршал Тито, а потоа го предводеше и Грасхоперс до врвот на Швајцарија.
Од 1994 до 2000 година беше селектор на Хрватска, што и најмногу го прослави откако на Мундијалот во Франција 1998 на дебито на својата држава ја однесе до полуфиналето и ја закити со бронзениот мадал.
Тренерската кариера ја заврши во 2015 година на клупата на Задар.