Порталот Ракомет24 првично објави дека хрватскиот ракометар Денис Тот (27) бил брутално претепан.
Нападот наводно се случил во ноќен клуб во Скопје, а веста ја пренесоа бројни медиуми од регионот. Но, директорката на КАРИЛ, Маја Мојсова, ги демантираше ваквите написи и извести дека Тот бил донесен во болница на реанимација, анестезија и интензивна нега во критична состојба поради срцев удар.
„Ракометарот е во критична состојба. Слободно, можам да кажам дека се бориме за неговиот живот. Но, тоа што е чудно е дека тој нема видливи знаци на насилство. На нашата клиника беше донесен без срцева акција. Правиме сè што можеме во моментот за да му го спасиме животот“, вели доктор Мојсова во изјава за „Фокус“.
Медиумите пишуваа дека ракометарот на Бутел бил претепан во ноќниот клуб „Привилиџ“, а снимките од нападот биле избришани. Исто така, се пишуваше дека Тот бил удиран со боксирачи и палки по целото тело. Од болницата тврдат дека нема траги на насилство.
Министерството за внатрешни работи на Северна Македонија соопшти дека од СВР Скопје Клинички центар во четвртокот во 4:11 часот биле известени дека Д.Т. (27) бил донесен во бессознание и без видливи знаци на насилство и веднаш му била укажана лекарска помош.
„СВР Скопје презема мерки за расчистување на случајот и за тоа соодветно ќе ја извести јавноста“, стои во соопштението.