Рано во средата наутро, некој на радиостаница за поп и рок музика во Ванкувер, Канада, ја пушти песната „Killing in the Name“ од Rage Against the Machine.
Потоа следеше истата песна.
И уште еднаш. И пак. И пак.
До пладне, песната изврти стотици пати на Kiss Radio 104,9 FM, што поттикна шпекулации на интернет дека единствената причина е протест против отпуштањата од матичната компанија Rogers Sports and Media.
Упатените во индустријата, сепак, тврдеа дека тоа е трик за да се сигнализира промена на форматот на станицата во алтернативен рок.
Текстот на песната ја вклучува повторената реплика: „Е*би се, нема да правам како што ќе ми кажеш ти!“ Станицата сепак ја пушти цензурираната радиска верзија.
Повикот до радиостаницата не помогна да се разјасни ситуацијата.
Човекот кој се јави на телефон не објасни зошто ја пуштаат песната на рипит, ниту пак го наведе неговото вистинско име. Наместо тоа, тој побара да биде наведен како Аполо, по ликот во филмовите за Роки.
„Немам дозвола да зборувам за тоа. Јас сум само дечко во кабина кој ги пушта Rage Against одново и одново“, рече Аполо. „Што мислите? Ви се допаѓа?“
Ова се случи еден ден откако ко-водителите на утринската емисија на станицата објавија на Facebook дека ненадејно биле отпуштени.
„Нашите пет години на KiSS RADiO завршија. KiSS се менува и за жал бевме информирани дека нема да бидеме дел од ова ново поглавје. Иако ова доаѓа со измешани емоции, сакаме да изразиме едно доминантно чувство: благодарност“, напишаа поранешните водители Кевин Лим и Соња Сиду.
Во средата, обидите на слушателите да побараат нешто друго освен „Killing in the Name“ беа одбиени.
