Кина престана да купува нафта од Иран откако Вашингтон ја соопшти одлуката да не ги продолжи отстапките од своите санкции за одредени земји, објави Wall Street Journal наведувајќи извор од иранската нафтена индустрија.
Според Рахим Заре, кој е член на Комисијата за економија во иранскиот Парламент, Кина, Грција, Индија, Италија, Јапонија, Јужна Кореја, Тајван и Турција (на кои претходно им беа дадени отстапки), во март купувале од Иран вкупно 1,6 милиони барели нафта дневно, но потоа прекинале со купување.
„Сите навистина ги почитуваат санкциите“, вели Заре.
Wall Street Journal потсетува дека кога кинески танкер бил наполнет со нафта во терминалот на островот Карг во Иран во средината на мај, тоа било протолкувано како знак дека Пекинг продолжува да купува сирова нафта . Меѓутоа, танкерот потоа отпловил кон Индонезија и сега е во близина на иранскиот брег, според податоците на FleetMon.
Бизнисмените во Техеран исто така забележале дека кинеските компании веќе не купуваат иранска нафта, нагласува весникот.
Иран сепак не губи надеж дека продажбата кон Кина ќе се обнови.
На осум од најголемите потрошувачи на иранска нафта им беа одобрени отстапки со кои привремено им се дозволи да продолжат да купуваат нафта од Иран. Во април, Белата куќа соопшти дека САД ќе ги укинат отстапките и ќе воведат санкции за нафтата на Иран со намера да го сведат извозот на нафта на оваа земја на нула.
САД рекоа дека осумте земји се согласиле драстично да го намалат увозот на иранска нафта.
