Кина ќе испрати три лица во вселената во својата прва мисија со екипаж по скоро пет години, како дел од амбициозниот план за завршување на вселенската станица до крајот на следната година.
Кина планира утре да го лансира вселенското летало Shenzhou-12 од Ѓиќуан во северозападната провинција Гансу, изјави денеска официјалниот претставник на кинеската вселенска агенција Ѓи Киминг.
Екипажот ќе се состои од астронаутите Ние Хаишенг (56), Љу Боминг (54) и Танг Хонгбо (45), додаде тој.
Мисијата ќе ја води Ние, поранешен пилот кој ќе биде најстариот национален астронаут што отишол во вселената. Ова е негово трето патување во вселената, по мисиите Shenzhou-5 во 2003 година и Shenzhou-10 во 2013 година.
Мисијата на Shenzhou-12, што значи „Божествен брод“ ќе биде третата од вкупно 11 мисии потребни за изградба на кинеска вселенска станица.
Кина започна со изградба на вселенска станица оваа година кога кон крајот на април го лансираше во орбитата Tianhe, првиот и најголемиот од вкупно три модули.
Тричлениот екипаж треба да остане три месеци на Tianhe, што значи „Небесна хармонија“.