По кристално чистите води на езерото Цјандао распослани лежат 1.078 острови, а на дното на езерото се крие древен град.
Езерото на илјада острови, како што се нарекуваат, се наоѓа во близина на Ханчоу, главниот град на крајбрежната провинција Џеџан во источнаот дел на Кина. Создадено е во 1959 година по изградбата на хидроцентрала на реката Чиантан, кога долината била поплавена со цел да се создаде резервоарот за вода.
Тогаш, со одлука на властите, поплавен бил античкиот град и бројни помали населби кои го опкружувале. Околу 300.000 луѓе кои живееле во областа биле преселени, а Ши Чен постепено тонел. Градот на лавовите, како што во превод гласи неговото име, во подножјето на планината Ву Ши (Планина на петте лава), денес лежи на околу 40 метри под површината на водата.
Ши Чен е основан за време на владеењето на династијата Хан, која владеела од 25 до 200 година од новата ера и била важен културен, политички и економски центар на земјата. Градот со векови ги менувал владетелите, а архитектурата станувала сè побогата и побогата.
Градот беше „повторно откриен“ во 2001 година кога кинеската Влада организираше експедиција за да види што останало од изгубената метропола.
Интересот за поплавениот град дополнително се зголеми во 2011 година, кога кинеското издание на магазинот National Geographic објави неколку неверојатни фотографии и илустрации, дотогаш невидени.
И покрај тоа што бил под вода долги години, Ши Чен останал исклучително добро зачуван. Водата го заштитила од ветер, дожд и сонце.
Во наредните години, следуваа бројни истражувања, при што беа откриени надворешните градски sидини, пет влезни порти и 265 заоблени премини. Откриени се утврдени антички маала и населби што Кинезите ги нарекувале со едно име - паифан. Зачуваните градби се претежно претставници на традиционалната кинеска конструкција од времето на династиите Мин и Чин, кои владееле од доцниот 14 до раниот 20 век.
Оваа енигматична „временска капсула“ ја краси Лавиринтот на белите храмови, спомен-сводовите со разни скулптури од лавови до елени, фенхуан (азиска варијанта на птицата феникс) до чилин (митско кинеско суштество со рогови), зачувани се и дрвени греди и скали, како и поплочени патишта и историски натписи.