Казната од неколку милијарди долари којашто кинеските регулатори ја изрекоа за Alibaba всушност го поттикна растот на акциите на овој гигант во е-трговијата, со што значително се зголеми богатството на Џек Ма, основачот на компанијата.
Акциите на Alibaba два дена по ред пораснаа на берзата во Хонгконг за 6%, додека на Вол Стрит во понеделникот за повеќе од 9%. Станува збор за најголемиот раст во последните 4 години.
Порастот на акциите оди во прилог на Џек Ма, чие богатство во еден ден порасна за 2,3 милијарди долари и изнесува вкупно 52,1 милијарда долари.
Џек Ма во моментов е дваесет и петтиот најбогат човек во светот и третиот најбогат човек во Кина. Минатиот викенд, кинеските пазарни регулатори му изрекоа казна од 2,8 милијарди долари.
Alibaba веднаш се согласи да ја плати казната и вети дека ќе обезбеди поотворена оперативна средина за своите трговци и партнери.