Американецот Мајкл Пакард, ловец на јастози, беше проголтан од голем грбав кит па по неколку секунди китот го исфрли од устата, пишува BBC.
56-годишниот Пакард изјави дека додека нуркал завршил во устата на кит каде минал околу 40 секунди по што китот го исплукал. За медиумите тој раскажа дека отпрвин мислел дека бил нападнат од голема бела ајкула, позната во таа област, но набргу сфатил дека станува збор за кит.
„Сфатив дека сум во устата на кит и дека тој се обидува да ме проголта. Помислив дека ова е сигурна смрт, во мислите се простив од жена ми и двата сина“, вели Пакард.
Тој изјави дека китот излегол на површината, го исфрлил од уста и почнал да ја тресе главата.
„Одеднаш се најдов во воздух, како на врв од фонтана и паднав во вода. Бев слободен и почувствував дека пловам по водата. Не можев да си поверувам“, раскажа тој.
И покрај постојаните молби од сопругата да најде друга работа, тој нема намера да ја заврши 40-годишната кариера како нуркач во Кеј Код.
Грбавите китови можат да пораснат до 15 метри и тежат околу 36 тони.
