Орките, односно китовите-убијци обично не напаѓаат луѓе, но сè почесто има случаи на напади во Шпанија, кога овие големи цицачи напаѓаат бродови.
Неколку орки на северот на Шпанија удирале и лулале бродови и чамци. Последниот случај се однесува на јахта долга 11 метри. Китовите удриле по јахтата најмалку 15 пати поради што се скршило кормилото па било невозможно да се управува со бродот. Јахтата на крајот била одвлечена до Коруна.
„Удираа во кормилото. Ги исклучивме моторите и целата електроника. Подоцна бевме спасени“, изјави капетанот на јахтата Beautiful Dreamer.
Шпанските власти објавија информации за инцидентот со цел да предупредат на опасноста. Ова не е првпат орки да напаѓаат бродови, два случаи претходно беа забележани и во август. Иако еден од бродовите се обидел да ги избегне орките, тие сепак го нападнале.
Научникот Алфредо Лопес истакнува дека ваквите инциденти се чудни, но нема причина за паника. Тој вели дека е можно орките да учат и експериментираат, но можно е нивно младенче да страдало во рибарска мрежа.
Засега остануваат само претпоставки за ваквото однесување на орките.