Саудискиот боксерски промотор Турки Алалших изрази желба во рингот да се врати легендарниот украински боксер Владимир Кличко.
Кличко, кој денес има 48 години, би можело повторно да влезе во рингот во борбата за титулата шампион во тешка категорија против Тајсон Фјури. Но, за да дојде до оваа борба потребно е да се исполнат неколку услови.
Како прво, Кличко би морал да се согласи да се врати во професионалниот бокс. Дополнително, Тајсон Фјури мора да го победи Олександр Усик во нивниот реванш на 21 декември. Кличко не би се борел со Усик бидејќи тие доаѓаат од иста земја, Украина, и не сакаат да се натпреваруваат меѓу себе.
„Мојот сон е да ја видам оваа борба. Доколку се согласи, Кличко би можел да стане најстариот шампион во тешка категорија во историјата“, изјави Алалших.
Актуелен рекордер е легендарниот Џорџ Форман, кој во 1994 година на 45-годишна возраст го нокаутира Мајкл Мурер и ја освои титулата. Кличко, кој во март ќе наполни 49 години, би имал шанса да го надмине тој рекорд.
Браќата Владимир и Виталиј Кличко доминираа на сцената во тешка категорија повеќе од една деценија, држејќи ги појасите на водечките организации до 2015 година. Владимир последен пат се бореше во 2017 година против Ентони Џошуа, во борба што ја загуби во 11. рунда. После тоа се повлече од професионалниот бокс, но сега постои можност уште еднаш да влезе во рингот и да се обиде да испише историја.
