Бројот на екстремни временски услови што се случуваат низ целиот свет се зголемува како резултат на климатските промени, покажаа истражувањата.
Околу две третини од копното на Земјата ќе се соочуваат со „влажна и понестабилна“ хидроклима на дневна и повеќегодишна основа, што значи поголеми промени помеѓу влажните и сувите екстреми, пишуваат истражувачите во студијата објавена во списанието Science Advances.
Научниците исто така предупредуваат дека една третина од вкупната површина на светот ќе стане уште посува.
Според тој меѓународен тим научници, екстремните врнежи од дожд претставуваат дополнителна закана за инфраструктурата и општеството воопшто.
Како прво, глобалното затоплување ја прави климата понеурамнотежена, „поекстремна во однос на влажноста и сушата“, рече тим предводен од професорката Венсја Џанг од Кинеската академија на науките во Пекинг.
„Хидролошкиот циклус се засилува со затоплување на климата, а просечните глобални врнежи се зголемуваат за еден до три проценти по степен на покачување на температурата на површината на воздухот“, се вели во студијата.
Но, овој тренд не е униформен и екстремните врнежи може да се зголемат уште повеќе во региони со многу атмосферска влажност.
Областите во влажни подрачја, како што се монсунските региони во Индија, најверојатно ќе бидат повеќе изложени на промени, со зголемување на обилните врнежи меѓу другите ефекти, се вели во студијата.
