Стратегот на Ливерпул е крајно незадоволен од прикажанато на своите играчи кои синоќа загубија минимално на гостувањето во Саутемптон.
Раниот гол на Дани Ингс постигнат уште во 2. минута го реши натпреварот бидејќи до крајот актуелниот шампион не успеа да го најде патот до мрежата на голманот Фрејзер Форстер кој немаше ни многу работа бидејќи фудбалерите на Клоп само двапати го примораа да интервенира.
„Почетокот на натпреварот најмногу ме вознемири. Не само примениот гол, туку играта генерално. Честитки до Саутемптон, заслужија. Совршено добро знаевме што да очекуваме од противникот, не можеше да нѐ изненадат, а сепак бевме изненадени. Како игравме на почетокот, каде губевме топки, не е некоја наука за да се види. Требаше многу подобро да одиграме, а ние препуштивме сè во рацете на противникот“, изјави Клоп за BBC.
„Едноставно не бевме добри. Тоа се случува кога немаш моментум. Требаше и мораше да направиме многу повеќе шанси. Мане требаше да добие пенал, а имаше и игра со рака. Не е изговор за очајната игра, туку дека може да се освои бод кога ти е дадена шанса. Сега мора да покажеме дека знаеме да се издигнеме“, смета Клоп.
Ова беше само втор пораз за Ливерпул сезонава кој сѐ уште е прв, но има исто бодови како и Манчестер Јунајтед кој има и натпревар помалку, а, интересно, разликата помеѓу Ливерпул и седмопласираниот Евертон е само 4 бодови.
