Напаѓачот на Тотенхем реши фудбалскиот локдаун да го искористи за да ја заврши должноста кон татковината.
Законот на Јужна Кореја вели дека секое здраво машко лице мора задолжително да отслужи воен рок во времетраење од 21 месец. Спортистите често добиваат дозвола да го пролонгираат тоа за по завршувањето на активната кариера, а Сон Хјон-мин искористи и едно потправило.
Драстично намален воен рок од само 4 недели отслужуваат спортистите кои на земјата ѝ донеле голем меѓународен успех, а Сон тоа го оствари со репрезентацијата до 23 години која триумфираше на Азиските игри во 2018. Слично како и на Олимписките игри, секоја репрезентација можеше да вклучи и четворица постари играчи, а меѓу нив беше токму и Сон.
Уште пред една недела, со дозвола на Тотенхем, Сон допатува во Јужна Кореја оценувајќи дека периодов е совршен за да ја отслужи должноста кон татковината. Сон и онака сѐ уште се опоравува по операцијата на раката, а новата најава дека Премиер лигата нема да почне пред мај му даде шанса да служи војска без тоа да се одрази на неговата кариера.
Со еден удар, Сон ќе среди две муви. Опоравен од повредата и со отслужен воен рок во мај ќе му се врати на фудбалот, нормално, доколку Премиер лигата продолжи според планираното.