Знаеме дека борачот Ибрагимов го освои првиот медал за Македонија на ОИ, но македонски спортисти освојувале медали и за време на Југославија.
Македонските спортисти на Летните олимписки игри имаат освоено вкупно 13 медали, сметајќи го и денешниот на теквондистот Дејан Георгиевски. Тој со пласманот во финалето има загарантирано барем сребро.
Сите знаеме дека од независноста, Македонија освои само еден олимписки медал. Тоа се случи на летната Олимпијада во Сиднеј во 2000 година кога борачот Магомед Ибрагимов во категоријата борење слободен стил до 85 килограми загуби во полуфиналето, за потоа да победи во борбата за третото место. Инаку, Ибрагимов како натурализиран спортист ги бранеше боите на Македонија. Тој е роден во Русија, во Дагестан, и е етнички Авар. Четири години претходно ги бранеше боите за Азербејџан и заврши петти, исто така како натурализиран.
Тоа е првиот олимписки медал во независна Македонија и единствен сѐ до денес. Но, Македонци и претходно освојувале медали настапувајќи под југословенското знаме и тоа вкупно 11 медали од кои два златни. Прв кому му пошло од рака е голманот Благоја Видиниќ кој освои сребро на ЛОИ 1956 во Мелбурн, а четири години подоцна дојде и до златото.
Ова се сите медали на македонските олимпијци освоени за време на Југославија:
- сребро - Благоја Видиниќ, фудбал
- злато - Благоја Видиниќ, фудбал
- сребро - Благоја Георгиевски-Буштур, кошарка
- бронза - Аце Русевски, бокс лесна категорија
- бронза - Шабан Сејдиу, борење слободен стил лесна категорија
- злато - Шабан Трстена, борење слободен стил суперлесна категорија
- сребро - Реџеп Реџеповски, бокс суперлесна категорија
- бронза - Милко Ѓуровски, фудбал
- бронза - Шабан Сејдиу, борење слободен стил до 67 килограми
- сребро - Стојна Вангеловска, кошарка
- сребро - Шабан Трстена, борење слободен стил до 52 килограми
Медали на македонските олимпијци по независноста:
- бронза - Магомед Ибрагимов, борење слободен стил до 85 килограми
- злато/сребро - Дејан Георгиевски, теквондо +80 килограми
Останува да видиме каков медал Георгиевски ќе ѝ донесе на Македонија. Неговата финална борба е денеска од 14:45 часот со директен пренос на МРТ1.