Го носи името на големиот картагински војсководец, а токму оттаму и доаѓа. Новопечениот репрезентативец на Тунис е голема надеж на Манчестер Јунајтед, велат дека ќе биде новиот Пол Сколс.
Ханибал Межбри има 18 години и роден е во Франција како дете на туниски имигранти, а во Манчестер е од 2019 година каде паралелно настапува за младинскиот и резервниот тим, а тренира со сениорите. Претходно настапуваше за младинските категории на Монако, Булоњ-Биланкур и Париз.
Откако со своите импресивни игри за резервниот состав го привлече вниманието на Оле Гунар Солскјер, минатата сезона го направи и дебито во Премиер лигата во натпреварот од последното коло кога влезе од клупата.
За него велат дека е замена за Пол Погба, па ништо чудно што управата на клубот тактизира со евентуалното заминување на Французинот. Неговиот поранешен тренер од времето кога играше во Франција вели дека Ханибал дефинитивно ги има сите квалитети за да биде новиот Пол Сколс.
„Премиер лигата бара голема атлетика и силен физички капацитет. Тој сѐ уште може да достави мускулна маса. Доколку го направи тоа и не го мачат повреди, ќе се наметне кај Солскјер, сигурен сум во тоа“, за First Time Finish вели Реда Бехти, кој го тренираше во Париз.
„Може да стане идниот Пол Сколс во Мначестер Јунајтед. Ги има сите потребни квалитети од средниот ред за да стане лидер“, додава тој.
Манчестер го доби неговиот потпис во 2019 година победувајќи во борбата со Барселона и ПСЖ кои исто така ја намирисаа светлата иднина на младиот Тунижанец. Патем, Ханибал веќе стана и репрезентативец на својата земја откако дебитираше во јуни на пријателска против Конго ДР, а потоа настапи уште на два натпревара. Претходно беше и репрезентативец на Франција во младинските репрезентации, но одлучи да ги брани боите на својата вистинска татковина.