Познат е списокот на финалисти во изборот „Европски автомобил за 2021“ (Car of the Year).
По објавувањето на поширокиот круг од 29 кандидати за автомобил на годината во Европа на крајот на 2020 година, списокот сега е намален на 7 финалисти.
За престижната титула се борат Citroen C4, Cupra Formentor, новиот електричен FIAT 500, Land Rover Defender, Škoda Octavia, Toyota Yaris и Volkswagen ID.3.
Иако имаше дури 4 модели Mercedes меѓу 29-те првични кандидати, меѓу финалистите нема ниту еден, а слично помина и корејското дуо Hyundai-Kia кое исто така имаше 4 модели на претходната листа.
Интересно е тоа што повеќедеценискиот европски бестселер, Golf, не успеа да се најде во потесниот избор (наместо него го имаме електричниот VW ID.3), а „честа“ на азиските производители ја брани само Toyota со моделот Yaris.
Меѓу кандидатите за автомобил на годината нема ниту еден Audi, но нема ниту BMW, иако германскиот гигант имаше двајца претставници во поширокиот круг на кандидати.
Меѓу седумте финалисти немаше место за некои нови автомобили што го привлекоа вниманието на пошироката публика во последната година, како што се новите Dacia Sandero, Peugeot 2008, Seat Leon...
Кој е вашиот фаворит од конечната седумка?
