Стив Хоџ е човекот кој го има фамозниот дрес на Марадона со кој ги постигна двата антологиски гола - Божјата рака и Голот на векот.
La mano de Dios
Мексико Сити, 22 јуни 1986 година. Во четвртфиналето на Мундијалот играат Аргентина против Англија. Во тек е 51. минута, Марадона тргнува во напад, додава до Хорхе Валдано, овој не ја контролира убаво топката и му ја одзема Стив Хоџ кој напамет ја исфрла во височина, но кон неговиот голман Питер Шилтон. Марадона не е во офсајд бидејќи топката доаѓа од противнички играч, се вивнува во воздух и на прв поглед успева со глава да го натскока Шилтон и да постигне гол. Но, голот е всушност со рака, а судиите тоа не го забележуваат. Аргентина води со голот кој ќе стане познат како Божјата рака (La mano de Dios).
The Goal of the Century
Само 4 минути подоцна следува слалом на Марадона. Ги поминува Питер Брдсли, Питер Рид, Тери Бучер, Тери Фенвик, повторно Бучер, и на крај голманот Шилтон и го дуплира водството, постигнувајќи го она што ќе стане познато како Гол на векот (The Goal of the Century).
„Беше неверојатен играч, но никогаш не можам да му простам за тоа што го направи“, вели измамениот Шилтон.
По натпреварот, Марадона и Хоџ си ги размениле дресовите, а Англичанецот до ден денес го чува драгочениот дрес со бројот 10, за кој имал и милионски понуди за да го продаде, но сите ги одбил. Последната, по смртта на Марадона, била 2 милиони долари.
„За мене тој дрес има неверојатна сентиментална вредност. Со години примам повици, како и преку ТВ и радио, а ми чукаат и на врата. Ме обвинувале и дека намерно одолговлекувам за да му ја зголемам цената. Но, на сите кои ми доставиле понуда им го дадов истиот одговор: 'Не е на продажба'“, вели Хоџ за BBC Radio Nottingham.
Кога Теру Бучер, викан Касапот, не само поради презимето Butcher (Касап) туку и поради неговите остри фаули, видел кој дрес го добил Хоџ, сакал да му го искине.
Всушност, Хоџ бил тој кој побарал размена со Марадона и тоа после натпреварот отишол во аргентинската соблекувална.
„Се шокирав и не можев да сфатам како некој може да влезе во аргентинската соблекувална и да го побара тој дрес... Марадона беше голем играч, но нѐ измами“, вели Питер Рид.
Англија на тој натпревар ја врати неизвесноста со голот на Гари Линекер на 9 минути пред крајот, но не успеа да стори ништо повеќе. Аргентина потоа стана и светски шампион, титула која им е последна на светската сцена.
