Во понеделникот, 25 ноември, мултимилијардерот Ворен Бафет го објави досега најдеталниот план за тоа што ќе се случи со неговото богатство по неговата смрт.
Планот е содржан во писмото на Бафет до акционерите на американскиот инвестициски конгломерат Berkshire Hathaway, чиј извршен директор е тој. 94-годишникот во писмо од 1.300 зборови напишал дека се надева дека неговата сопруга ќе го надживее и ќе одлучи како да го подели богатството. Тој го истакна фактот дека е во својата десетта деценија од животот и дека е свесен дека на овој живот му доаѓа крајот.
Тој се надева дека неговите три деца - Сузи, Хауард и Питер, кои се во нивните 60-ти и 70-ти години - ќе живеат доволно долго за да одлучат на кои добротворни организации ќе им биде донирано дел од богатството на нивниот татко. Им постави задача да ја донесат таа одлука едногласно. Меѓутоа, доколку не се согласат по тоа прашање, тогаш богатството ќе биде донирано на три субјекти кои тој ги одредил, а кои тој не ги прецизирал во писмото.
„Очекуваниот животен век на моите деца е значително пократок од моментот на ветувањето што го дадов во 2006 година. Никогаш не сум сакал да создадам династија или да следам некаква агенда што ги надминува самите деца“, напиша еден од најбогатите луѓе во светот.
Тој најави дека ќе конвертира 1.600 акции од класа А во 2,4 милиони акции од класа Б, кои имаат помалку право на глас. Од тие 2,4 милиони акции, 1,5 милиони ќе бидат донирани на фондацијата „Сузан Томпсон Бафет“, именувана по неговата прва сопруга која почина, додека 300.000 акции ќе бидат донирани на три фондации управувани од неговите деца, чија вкупна вредност е 1,2 милијарди долари.
Покрај тоа, Бафет е донатор на фондацијата „Бил и Мелинда Гејтс“, која ја формираа ко-основачот на Microsoft Бил Гејтс и неговата поранешна сопруга Мелинда.
Во 2006 година, тој вети дека ќе продолжи да го донира своето богатство, кое американскиот деловен медиум Bloomberg го процени на 150 милијарди долари. Тој претходно им даваше совети на другите богати родители како да постапат со својот имот пред да умрат.
„Кога вашите деца ќе станат возрасни, нека го прочитаат вашиот тестамент пред да го потпишете. Погрижете се секое дете да ја разбере логиката на вашите одлуки и одговорноста со која ќе се соочи по вашата смрт“, советува Бафет, според CNN.
