Кокосовите колачиња се мек и сочен десерт за кој се потребни само 30 минути и 4 состојки за да се подготват.
Нивното потекло е од Германија, каде што се нарекуваат Кокосмакронен (Kokosmakronen). Во некои верзии на популарниот рецепт се додава и чоколаден прелив или сок од лимон.
Потребни состојки:
- 250 гр кокос
- 200 гр шеќер
- 4 белки
- 1 лажичка екстракт од ванила
Подготовка:
Со миксер изматете ги белките во цврст снег 5 минути. Потоа додадете една лажичка екстракт од ванила и доматете. Постепено додавајте кокос и шеќер и продолжете со матење.
Кога сѐ убаво ќе изматите, смесата може да ја извадите со лажица и да ја наредите во тавче обложено со хартија за печење или да користите кесичка за крем со широка млазница. Печете ги колачињата околу 20 минути во загреана рерна на 150 степени. Кога ќе поруменат, извадете ги од рерна и оставете ги да се изладат пред да одлучите да ги послужите.
