Досегот, заедно со цената, е главната тема на дискусија за електричните автомобили, особено кога се споредуваат со конвенционалните.
Без разлика дали сакате да признаете или не, сè укажува на фактот дека возилата напојувани од фосилни горива и оние на електрична енергија имаат една сличност - декларираната потрошувачка на гориво/енергија е невозможно да се постигне во пракса.
Затоа, тестовите за проверка на досегот јасно укажуваат на употребливоста, особено на електричните автомобили. И покажаа дека при ниски температури на околината досегот опаѓа и до 30 проценти.
Најновото истражување беше спроведено од What Car?, кој подложи десетина електрични автомобили на тест за досег. Автомобилите со целосно наполнети батерии беа оставени надвор во текот на ноќта на температури блиску до 0⁰C. Вториот ден автомобилите беа однесени на тест патеката.
Иако, очекувано, прв „попушти“ Mini со најмалата батерија и најмалиот досег, кинескиот Ora Funky Cat First Edition имаше најголем пад на опсегот. Наместо 310 километри, тој помина 208 километри или 33 отсто помалку.
Повеќе од 30% намалување на досегот имаше и Renault Megane E-Tech (32,1%), додека најмал пад на досегот имаа Tesla Model Y LR (17,8%) и Nissan Ariya (16,4%).
Ако гледаме на ефикасноста, односно потрошувачката на енергија, работите се малку поинакви. Најголема потрошувачка, очекувано, има Volkswagen ID Buzz, кој поминува 4 км со 1 kWh енергија. Најефикасен е лесниот Mini, кој со исто толку енергија ќе помине 6,3 километри. И тоа е подобар резултат од декларираниот.
Три модели од тестот беа проверени од авторите на истражувањето и во текот на летото кога температурите беа од 24 до 29°C. Досегот на Tesla Model Y на ладно време падна за 11,8%, Cupra Born изгуби 20,6% досег, а BMW i4 21,6%.
За потсетување, InsideEVs Italia спроведе сличен практичен тест за проверка на досегот. Забележано е намалување на досегот во споредба со WLTP, од 16 до дури 31%, во зависност од моделот.
