Германскиот медиумски гигант Axel Springer соопшти дека го отпуштил Џулијан Рајхелт, главен и одговорен уредник на Bild, еден од неговите најпродавани таблоиди, откако New York Times објави обвинувања од негови колешки за наводно недолично однесување.
Рајхелт беше на привремен одмор претходно оваа година, откако призна дека имал љубовни афери со вработени во компанијата, но внатрешната истрага не откри злоупотреба на моќта.
Во соопштението на Axel Springer стои дека компанијата, по најновите медиумски извештаи, „доби нови сознанија“ за однесувањето на Рајхелт. „Раководството откри дека Џулијан Рајхелт, дури и по завршувањето на истрагата спроведена оваа пролет, јасно не го оддели приватниот од професионалниот живот“ и дека не ја зборува вистината.
Рајхелт се нема јавно изјаснето
Извршниот директор на Axel Springer, Матијас Допфнер, ги пофали достигнувањата на Рајхелт во новинарството, но тврди дека е невозможно да го задржат.
Еден ден претходно, New York Times објави колумна со детали за аферите на Рајхелт. Се наведуваат детали за неговата врска со помлада вработена, која за време на истрагата на компанијата сведочеше, меѓу другото, дека Рајхелт ја поканил во хотел во близина на канцеларијата за секс.
Германската издавачка група Ippen се подготвуваше да објави истражен напис за злоупотреба на моќта во Axel Springer, но статијата беше повлечена од печатeње со образложение дека Ippen не сака да создаде впечаток дека се обидува да нанесе финансиска штета на еден на неговите конкуренти.
Во писмото што го прими Reuters, истражувачкиот тим на Ippen, чие истражување се осврна на наводите за малтретирање на жени во Axel Springer, особено од Рајхелт, го изрази својот шок што нивниот напис, кој требаше да биде објавен во неделата, не е објавен.
Во своето писмо до водачот на таа издавачка група, четворица новинари од Ippen тврдат дека претставници на Axel Springer го контактирале Ippen.
Ippen негира дека одлуката за повлекување на текстот е донесена под влијание на Axel Springer, а групата објави дека Axel Springer е посветена на транспарентност, не се противи на критичкото известување во принцип и дека компанијата нема информации дека некој внатре се обидел да го запре објавувањето на написот.