НАСА вчера го објави документот Lunar Exploration Program Overview во кој ги објасни фазите и трошоците за програмата Artemis.
САД сакаат до 2024 година на Месечината да испратат уште еден маж астронаут и првата жена астронаут, а се планираат и други мисии. Мисијата во 2024 ќе биде првата мисија со човечки екипаж на Месечината по 1972 година.
Лунарната програма Artemis ќе чини 28 милијарди долари заклучно со фискалната 2025 година, вклучувајќи ги оние 7,6 милијарди долари за огромните ракети Space Launch System со кои ќе управува Boeing, како и капсулите Lockheed Martin Orion во кои ќе патува екипажот до Месечината.
16,2 милијарди долари ќе бидат потрошени за развој, тестирање и лансирање на нови лендери за на Месечината од кои ќе зависи слетувањето на астронаутите на месечевата површина, што зазема најголем дел од буџетот за првата фаза на Artemis.
Оваа фаза опфаќа три лета до Месечината: еден беспилотен тест-лет на бустерот SLS и на капсулата Orion кон крајот на следната година, па 10-дневен лет околу Месечината во 2023 година со човечки екипаж и слетување на Јужниот Пол на Месечината во 2023 година, со човечки екипаж. Во буџетот се вклучени и трошоците за развој на нови скафандри за астронаутите.
НАСА веќе избра три компании кои ќе развијат и изработат вселенски летала со кои во наредниве години астронаутите ќе слетаат на Месечината во рамки на програмата Artemis.
Избрани се компаниите Blue Origin на Џеф Безос, SpaceX на Елон Маск и американската Dynetics која е во сопственост на Leidos, чиј извршен директор е Роџер Крон.
Вкупната вредност на договорите на трите компании, што ќе бидат склучени на период од 10 години, изнесува 967 милиони долари.
Конгресот на САД, што ги очекува претседателските избори на 3 ноември, сега треба да го одобри планот за праќање астронаути на Месечината, што пак, сегашниот претседател Доналд Трамп го постави како врвен приоритет.
Од друга страна пак, шефот на НАСА, Џим Брајденстин потсети на „политичките ризици“ од можна смена на шефот на државата. Според тамошните медиуми, на пример, Џорџ Буш потроши милијарди на подготовки за астронаутска мисија на Марс, а неговиот наследник Барак Обама ги откажа сите тие активности.
– Сепак, сѐ уште сме „на патот“ кон слетување на Месечината во 2024 година… Одиме на Јужниот Пол (на Месечината). Нема дискусии за ништо друго освен за тоа, вели Брајденстин.
Според Брајденстин, човештвото го очекува нешто ново, сосем поинакво од што било што научниците направиле досега.