Националниот центар за океанографија на Велика Британија (NOC) спроведе истражување во кое собра примероци од горниот слој од 200 метри во средината на Атлантскиот Океан.
Резултатите од истражувањето се објавени во специјализираното научно списание Nature Communications.
Доктор Кација Паборцава од NOC, која беше водач на истражувањето, изјави дека преку мерењата на масата на малите пластични честички во горните 5% од океанот, таа со нејзините колеги процениле дека „количината на пластичен отпад во Атлантскиот Океан“ е „многу поголема“ од она што се сметаше досега.
„Претходно, не можевме да ја балансираме количината на пластика најдена во океанот со количината што сметавме дека завршува таму“, рече таа.
„Тоа беше така бидејќи не ги меревме најмалите честички“.
Само во Атлантскиот Океан пловат 12 до 21 милиони тони ситни честички пластика, открија научниците. Количина од 21 милион тони микропластика е доволно да се наполнат 1.000 товарни бродови.
На експедицијата од Велика Британија до Фокландските Острови, Паборцава и нејзините колеги откриле дека има до 7.000 честички микропластика во еден кубен метар морска вода.
Тие ги анализирале примероците за трите најчесто користени полимери кои исто така и најчесто се фрлаат: полиетилен, полипропилен и полистирен, кои често се користат како амбалажа за пакување.
Тимот се надева дека овие откритија ќе помогнат во напорите да се измери еколошката штета предизвикана од пластичните честички, со тоа што ќе овозможат поконкретно мерење на насобраната микропластика во зафрлените делови на океанот.
Професор Џејми Вудворд, експерт за загадување со пластика од Универзитетот на Манчестер, за BBC изјави дека овие откритија ги потврдуваат претходните студии дека количината на микропластика во океаните е многу поголема отколку што претходно се проценуваше.
„Географскиот размер на истражувањето е импресивен“, рече тој.
Некои еколошки групи предупредуваат дека од почетокот на пандемијата, медицинските маски и ракавици сочинуваат сѐ поголем дел од пластичниот отпад.
„Наоѓаме повеќе маски за еднократна употреба отколку најлонски кеси“, рече Сузана Бликли од хуманитарната организација Morecambe Bay Partnership од Камбрија, која ги координира акциите за чистење на плажите во Велика Британија.
„Она што го бараме од луѓето е да ја намалат употребата на пластика за една употреба и да ја фрлаат/селектираат соодветно“.
