Извршниот директор на Volkswagen и Porsche, Оливер Блуме, минатата година заработи повеќе и покрај тоа што се откажа од дел од својата плата.
Со пензиски придонеси и бонуси за повеќе години, Блуме добил речиси 10,35 милиони евра во 2024 година. Тоа е за 6,5 отсто повеќе од претходната година, кога заработи 9,7 милиони евра, се вели во деловниот извештај на групацијата, пренесува dpa.
Вкупната плата се состои од приходи од Volkswagen и неговата подружница Porsche. Оливер Блуме е на чело на двете компании.
Блуме, како и целиот одбор на директори на концернот, се откажа од пет проценти од фиксната плата во Volkswagen во 2024 година, па основната плата му беше намалена од 1,3 на 1,235 милиони евра.
Променливиот дел од платата во VW исто така беше нешто помал од претходно. Меѓутоа, во исто време се зголеми и платата на Блуме во Porsche.
Вкупно деветте членови на раководството на концернот заедно заработиле околу 40 милиони евра. Во наредните години се планирани големи намалувања.
Во текот на оваа и следната година, членовите на раководството се откажуваат од 11 отсто од вкупниот приход. Со непроменети плати тоа значи заштеда за концернот од повеќе од четири милиони евра годишно.
После тоа, намалувањата постепено ќе се укинуваат.
