Филмското студио Universal го објави првиот и најверојатно единствен трејлер за „The King of Staten Island“ на режисерот Џад Апатау, само 11 дена откако соопшти дек филмот ќе има премиера на 12 јуни, но не во кината, туку преку PVOD.
Во текот на неговата плодна кариера, Апатау ги лансираше филмските кариери на низа надежни комедијантски таленти како Стив Карел, Сет Роген, Џона Хил, Џејсон Сигел, Кристен Виг, Ејми Шумер и Кумаил Нанџијани.
Сега работеше со младиот Пит Дејвидсон, кој влезе во фокусот на пошироката јавност благодарение на Saturday Night Live, во комедијата за љубовта, загубата и смеата во Стетон Ајленд.
Дејвидсон го игра Скот, кој се соочува со проблеми по смртта на татко му, пожарникар кој починал на должност кога тој имал седум години. Сега скот има 24 години и е далеку од остварувањето на сонот – да стане тату артист. Неговата амбициозна помлада сестра (Мод Апатау) заминува на колеџ и тој останува да живее со мајка му, медицинска сестра која е уморна од животот и работата (Мариса Томеи). Деновите ги поминува пушејќи марихуана, дружејќи се со неговите другари Оскар (Рики Велез), Игр (Мојсес Аријас) и Ричи (Лу Вилсон) и тајно се гледа со неговата другарка од детството Келси (Бел Паули).
Но, кога мајка му ќе почне да се гледа со пожарникарот Реј (Бил Бар), тоа придвижува низа настани кои ќе го натераат Скот да се соочи со загубата и тагата и да ги направи првите чекори кон тоа да преземе контрола врз својот живот.
Комедиите со големи имиња порано се сметаа за гарантиран успех во киносалите, а ѕвездата на „The King of Staten“ Дејвидсон ужива огромна популарност кај младата публика. Но, пандемијата смени сѐ, па сега сите надежи се вложени во онлајн стримувањето што ќе чини 20 долари за достапност од 48 часа.