Комисијата за заразни болести на денешниот состанок побара МТСП да доработи дел од протоколите за градинките.
На состанокот на Комисијата за заразни болести, освен претставници на Министерството за образование и наука, беа присутни и претставници на Министерството за труд и социјална политика при што се разговараше и за протоколите за почеток на работењето на градинките.
Заклучокот беше дека дел од протоколите треба да се доработат од страна на МТСП, да се разгледаат и потоа да се донесе одлука во врска со почеток на работењето на градинките.
Беше разгледана и информацијата за воведување на PCR тестови за граѓаните од ризичните земји кои транзитираат низ нашата земја. Засега Комисијата продолжува будно да ја следи ситуацијата и доколку се утврди дека има потреба, не се исклучени дополнителни мерки. Со постојните мерки, граѓаните кои транзитираат низ земјава потпишуваат изјава дека за три часа ќе ја напуштат земјата и не претставуваат опасност за ширење на коронавирусот во нашата земја, се додава во соопштението од Министерството за здравство.
