Ноќеска се одигра реванш финалниот натпревар од северноамериканската Лига на шампиони каде конечно запре долгогодишната мексиканска доминација откако Сиетл Саундерс успеа да го освои пехарот.
После 16 години апсолутна доминација на клубовите од Мексико, кои од 2006 до лани секогаш го освојуваа пехарот, годинава проклетството е прекинато и американски тим конечно успеа да стане шампион на Лигата на шампиони на КОНКАКАФ.
Тимот на Сиетл Саундерс откако се избори за 2:2 на првиот натпревар во Мексико Сити ноќеска со убедливи 3:0 на „Лумен Филд“ го преслуша УНАМ и во своето прво финале успеа стане шампион.
„Зелените“ го отворија резултатот во последната минута пред паузата кога перуанскиот голгетер Раул Руидиас ја затресе гостинската мрежа. На вториот се чекаше до 80-тата кога истиот играч на асистенција на поранешниот уругвајски репрезентативец Николас Лодејро го дуплираше водството, додека две минути пред крајот и капитенот Лодејро се запиша во листата на стрелците поставувајќи ги конечните 3:0. Токму тие двајца се и најпознатите играчи во редовите на тимот од Сиетл.
Последен пат кога еден американски тим го крена овој пехар беше пред дури 22 години кога во 2000 година Лос Анџелес Галакси стана шампион. Оттогаш само костариканските Алахуеленсе и Саприса накратко ја прекинуваа мексиканската доминација во 2004 и 2005.
Последниве десетина години Мексиканците најчесто меѓу себе играа финале, а понекогаш беа предизвикувани од канадските тимови Монтреал Импакт и Торонто, особено вториот кој во 2018 дојде многу блиску губејќи на пенали. Последен пат американски тим се обиде во 2020 кога Лос Анџелес беше поразен.
Сиетл на патот до титулата тргна елиминирајќи ја Монтагуа од Хондурас во осминафиналето (нема групна фаза во Лигата на шампиони на КОНКАКАФ), потоа го исфрли мексикански Леон, а во полуфиналето се пресмета со Њујорк Сити. Во сите 8 натпревари, вклучувајќи го и финалето, Сиетл не загуби ниту еднаш.
Со триумфот во северноамериканската Лига на шампиони „Зелените“ се изборија за учество на Светското клупско првенство кое треба да се одржи во Кина.