Интер е пред елиминација од Лигата на шампионите откако синоќа загуби дома од Реал Мадрид, а стратегот Антонио Конте смета дека црвениот картон му кумувал на конечниот резултат.
Кралскиот клуб со 2:0 славеше на „Џузепе Меаца“ откако поведе уште во 3. минута со гол од пенал. Потоа во 33. минута за сличен прекршок англискиот судија Ентони Тејлор не досуди пенал за Интер по што фаулираниот Артуро Видал протестираше и доби жолт картон, што само го изнервира Чилеанецот за неспортски да реагира на нанесената неправда и да биде исклучен.
„И онака е тешко да се игра против тим каков што е Реал Мадрид, а немавме ни среќа во двата натпревара. Кога веднаш ќе примите гол и потоа ќе останете со 10 играчи, само додатно се комплицираат работите. Нажалост, мислам дека ја видовме разликата помеѓу тие и нас. Како и да е, ова не смее да нѐ депримира. Екипите се на различни нивоа и треба да се подобриме во секој аспект. Тие ја освоија Лигата на шампиони неколку пати, додека ние тек сега се појавуваме во ова натпреварување. Мора да работиме за да ја намалиме разликата и да се вратиме помеѓу најдобрите“, изјави Конте.
Откако со исклучувањето на Видал Интер остана со играч помалку, во второто полувреме успеа и да ја подобри играта, но тоа не резултираше со гол во гостинската мрежа.
„Беше тешка битка. Примивме гол, што направи тешко да се вратиме во игра, а потоа Видал беше исклучен што тотално нѐ исфрли од колосек. И покрај сѐ, момците дадоа сѐ од себе против еден одличен противник. Тоа е тоа, но во секој случај одигравме многу подобро во првиот натпревар против нив, кога и бевме многу поагресивни“, заврши италијанскиот стратег.
Интер со 2 бода од 4 натпревари е закован на дното од табелата и само со теоретски шанси може да се пласира во осминафиналето. Две победи во последните две кола и два пораза на Борусија од Менхенгладбах, од кои едниот во директен дуел, би ја направиле математиката за Интер.
