Контроверзниот концепт со две врати го најавува серискиот, целосно електричен GT со четири врати.
Контроверзниот Type 00 Concept на Jaguar неочекувано се појави на улиците на Париз, привлекувајќи внимание со новата боја.
Во меѓувреме, извршниот директор на Jaguar, Роудон Гловер, откри нови детали за претстојниот целосно електричен GT модел со четири врати, кој ќе биде лансиран кон крајот на 2025 година.
Концептот дебитираше во Париз во нијанса наречена French Ultramarine, која значително се разликува од претходните бои Miami Pink и London Blue.
Прототипот ги задржа сребрените акценти на долниот дел од каросеријата и постоечките алуминиумски тркала, со необична естетика која предизвика многу контроверзии од неговото претставување.
Како што може да се види на снимката, Type 00 вози низ улиците на Париз пред да застане пред локацијата на која се одржува Париската модна недела.
Вратите во форма на крила полека се подигнуваат, а од автомобилот излегува ирскиот актер Бери Коган кој ја зрма јакната од футуристичкиот багажник.
Присуството на Коган обезбеди дополнително медиумско внимание за Jaguar, а тој подоцна позираше на возачкото седиште, откривајќи ја внатрешноста на автомобилот.
Само неколку дена пред Type 00 да го има своето деби во Париз, извршниот директор на Jaguar, Роудон Гловер, му даде на Autocar нови информации за првиот сериски модел во електричната трансформација на брендот.
Овој модел ќе го преточи дизајнот Type 00 во суперлуксузен седан со четири врати.
Гловер потврди дека новиот GT со четири врати ќе ја задржи радикалната естетика на концептот. Дизајнерите и инженерите работеа заедно за да се осигураат дека обликот на возилото не ги загрозува безбедноста, перформансите и аеродинамиката.
Неодамнешните шпионски фотографии сугерираат дека серискиот модел ќе има долга хауба, тенки LED фарови, спортска линија на покривот и широк став.
Кога станува збор за ентериерот, Гловер рече дека Jaguar се фокусирал на дизајнот, изработката и искуството во возењето, а не само на технологијата, оставајќи им ја таа област на кинеските конкуренти.
Целта е да се создаде „неверојатно место за престој“, каде технологијата ќе биде присутна, но дискретна и функционална.
Сите идни модели на Jaguar ќе ја користат Jaguar Electric Architecture, нова механичка платформа исклучиво наменета за електрични возила.
Иако електричните мотори и батериите ќе се делат со другите производи на JLR, секој Jaguar ќе има уникатен дизајн.
За серискиот модел GT, Jaguar цели на опсег од околу 690 км и моќност од 1.000 КС (735 kW) во најмоќната верзија.
Според Гловер, тимот поминал денови тестирајќи ги најдобрите модели на Jaguar на сите времиња, барајќи инспирација за дотерување на новиот EV.
Нивната цел беше да создадат автомобил што ќе можете да го возите брзо и долго, а притоа да се чувствувате одлично.
Самиот Гловер возеше прототип на новиот модел GT до 258 км/час во тест центарот на Jaguar во Гејдон, нарекувајќи го најзабавното искуство откако ја презеде компанијата.
„Беше спектакуларно во однос на брзината, забрзувањето и перформансите, но имаше и посебен карактер во испораката на моќност. Нашиот тим е воодушевен од можностите на ова возило“.
По премиерата на моделот GT со четири врати кон крајот на 2025 година, Jaguar ќе ја прошири својата понуда со уште два модела, кои се очекува да бидат луксузна лимузина и SUV.
Зборувајќи за идното портфолио, Гловер рече:
„Моделот GT има задача да покаже дека Jaguar може да има цена од повеќе од 100.000 фунти, бидејќи и концептот и брендот се способни за тоа. Другите модели ќе имаат поинаква улога – да привлечат поширока публика, да донесат поголем обем на продажба и да исполнат други цели.“
За разлика од некои други производители кои ги забавија своите планови за транзиција кон електрични возила, Гловер јасно стави до знаење дека Jaguar ќе остане целосно електричен бренд:
„Уште во 2021 година, донесовме одлука да развиеме архитектура исклучиво за електрични возила. Нема опција да ставиме V8 мотор во него или нешто друго. Целосно сме посветени на електрификацијата.“
