Иако по премиерата доби многу лоши критики и оценки, филмот „365 Days“ на Netflix ќе добие уште две продолженија, пишува Variety.
Полскиот филм доби оцена 3,3/10 на IMDb, додека на страницата Rotten Tomatoes беше оценет како „многу лош/скапан (rotten)“, но исто така и како „лоша копија на трилогијата Fifty Shades of Grey“.
Познатото списание Variety го прогласи за еден од најлошите филмови во 2020 година, но и покрај сето тоа - филмот се здоби со неверојатно голема популарност ширум светот.
Филмот е базиран според првиот роман на истоимената трилогија на Бланка Липињска и во кината во Полска излезе на 7 февруари 2020. Netflix го откупи и го направи достапен на платформата лани кон средината на јуни, од кога почна да привлекува огромно внимание. Netflix одби да го тргне филмот од својот репертоар.
Во првиот дел, Масимо Торичели (Микеле Мороне) е шеф на сицилијанската мафија, чие раководство го презема откако ќе биде убиен татко му. Лаура (Ана Марија Сиеклучка) е директорка за продажба во луксузен хотел во Варшава, на која ѝ недостига малку страст во животот да за биде совршен. Таа се обидува да си ја спаси врска со патување во Италија, каде не ни претпоставува дека ќе биде киднапирана од најопасниот човек на островот. Масимо опсесивно ќе се заљуби во Лаура, ќе ја задржи во заробеништво, но таа ќе има „доволно време“ – поточно 365 дена - да се заљуби во него. За тоа време тој ја опсипува со луксуз, пари, скапа облека, забави и сè што може да се купи со пари. Уште една приказна со доминантен богат маж и млада убавица која не може да му одолее.
Што носат продолженијата?
Во новите два дела, ќе го следиме развојот на врската на Масимо и Лаура, што дополнително ќе биде комплицирано од неговото семејство. Покрај тоа, во животот на Лаура ќе се појави уште еден маж чија цел е да го освои нејзиното срце.
