Во Исланд е извршено тестирање клучно за контрола на коронавирусот и создавање клучна слика за ширењето на COVID-19. Оваа држава со 360.000 жители тестираше повеќе од 17.900 луѓе, 5% од популацијата.
И додека Националната универзитетска болница ги тестира луѓето кои се во високоризична група или покажуваат симптоми, скоро половина од нив се тестирани од биофармацевтската компанија DeCODE Genetics, фокусирајќи се на пошироката популација, пренесе CNN.
Пресудно е тоа што ги скенираат и оние кои не покажуваат симптоми и моментално не се наоѓаат во карантин, стои во изјавата на Управата за здравство. DeCОDE досега тестирале 9.000 луѓе.
„Резултатите од дополнителните тестови покажаа дека напорите за ограничување на ширењето на вирусот досега се ефикасни“, соопшти владата минатата недела, додавајќи дека тестирањето ќе продолжи и ќе даде многу појасна слика за реалното ширење на вирусот SARS CoV-2 на Исланд.
Иако помалку од 1% од тестовите биле позитивни на вирусот, основачот на компанијата д-р Кари Стефансон рече дека околу 50% од испитаниците позитивни на коронавирус рекле дека се без симптоми, со што се потврдуваат испитувањата кои покажаа дека асимптоматските или благосимтоматските случаи имаат важна улога во ширењето на вирусот.
„Важно е да ги откриваме луѓето во раната фаза на зараза, пред да почнат да покажуваат симптоми“, вели Стефансон.
Тој се прашува дали мутациите на вирусот на некој начин се одговорни за тоа како некои луѓе различно реагираат, кај некои се појавува само блага настинка, додека на други им е потребен респиратор и слично.
Во Исланд се затворени училиштата и забрането е да се собираат повеќе од 100 луѓе. Водат агресивна политика за карантин за поединци за кои се сомневаат дека се во опасност поради зараза и тој трае подолго за разлика од другите земји.
Исланд почна со тестирање на почетокот на февруари, неколку недели пред првиот смртен случај поврзан со вирусот. Во земјата има 1.086 потврдени случаи, 927 луѓе се во изолација, а повеќе од 5.000 излегоа од карантин.
„Единствената причина што ни оди добро е што сме многу повнимателни. Сериозно ја сфативме веста за пандемија која почна во Кина. Не слегнавме со рамената и не рековме ова нема да биде нешто вонредно“, вели Стефансон.
Тој очекува да се тестираат најмалку 50.000 луѓе или 13% од популацијата.
