Македонската кошаркарска репрезентација денеска ги продолжува квалификациите за пласман на ЕвроБаскетот 2021, а противник на неутрален терен е Италија.
Голем хендикеп за нашите репрезентативци ќе биде неиграњето на плејмејкерот Ненад Димитријевиќ кој од својот клуб Жувентуд де Бадалона не доби дозвола да ѝ се приклучи на репрезентацијата со изговор за корона-мерките.
Затоа, пак, во Естонија е американското засилување, центарот Џејкоб Вајли кон кого се вперени надежите на македонските навивачи. Како и Димитријевиќ, Вајли настапува во шпанското првенство бранејќи ги боите на Гран Канарија.
Македонија и Италија за прв пат ќе се сретнат во официјален натпревар бидејќи досега имаат одиграно само две пријателски средби и тоа пред 6 и 9 години, а на двете победи Италија.
Натпреварот во „Саку Суурхал“ арената во Талин почнува во 15 часот по македонско време, а Македонија е пред императив победа доколку не сака шансите за пласман на ЕвроБаскет 2021 да ги сведе на теорија. Директен пренос ќе врши SportKlub 3.