Владата на Косово го одложи за еден месец спроведувањето на мерките за реципроцитет со Србија во врска со личните карти и регистарските таблички.
Како што соопштија властите во Приштина, овие мерки ќе бидат одложени до 1 септември.
Според медиумите во Косово и Србија, Владата на премиерот Албин Курти го направила тоа на барање на САД.
По најавата на Приштина дека од 1 август ќе почне примената на одлуката за пререгистрација на возила и лични карти, граѓани од северот на Косово на неколку локации во Северно Косово поставија барикади. Претходно сирени се огласија во северниот дел на Косовска Митровица. Во меѓувреме сирени се слушнале и во Зубина Поток. КФОР соопшти дека „ја следи ситуацијата и собира податоци“.
Одложувањето на одлуката го поздравија високиот претставник на ЕУ за надворешна политика и безбедност Жузеп Борељ и специјалниот представник Унијата за дијалогот меѓу Белград и Приштина, Мирослав Лајчак.
– Отворените прашања треба да се решат преку дијалог со посредство на ЕУ и да се фокусираат на сеопфатна нормализација на односите меѓу Косово и Србија, што е од суштинско значење за нивната интеграција во ЕУ, напиша Борељ на Twitter.
– Ја поздравуваме одлуката на Косово да го прифати предлогот на Жузеп Борељ за едномесечно одложување. ЕУ очекува веднаш да се отстранат сите блокади на патиштата. Борељ ги повикува Косово и Србија да се вклучат во дијалог за напредок. Благодарам на американската амбасада во Приштина за силна поддршка, објави на Twitter, Мирослав Лајчак.