Женската ракометна репрезентрација на Македонија и на реваншот во Скопје загуби убедливо од Романија со што и дефинитивно е елиминирана на последната пречка пред Мундијалот.
Откако на првиот натпревар во Букурешт пред четири дена загубивме со 11 голови разлика (33:22), денеска во Скопје ниту се случи чудо, ниту пак бевме блиску и до минимална победа.
Самоуверените Романки буквално ја прегазија нашата репрезентација и со уште повисока разлика од 15 голови го прославија пласманот на Мундијалот кој во декември ќе се одржи во Шпанија.
Во победата од 35:20 најефикасна на паркетот беше Лаура Моиса со 8 голови, а зад неа со 6 беше нашата Елена Ѓеорѓиевска.
Женската репрезентација нема настап на Мундијал од 2007 во Франција кога последен пат учествувавме. Во изминативе три квалификациски циклуси секогаш не успеваме да ја минеме таа последна пречка, овој пат поради Романија, а претходно губевме од Словенија и Шведска.
Романија е единствената репрезентација во светот која има настапувано на сите Мундијали, а годинава на 25-тиот ќе го запише и своето 25-то учество.
