Кралот Чарлс Трети повторно ја шокира јавноста откако реши да продаде некои од коњите за тркање, наследени од кралицата Елизабета Втора, пишува BBC.
Аукциската куќа Tattersalls соопшти дека продава 14 кобили кои претходно биле во сопственост на кралицата Елизабета Втора. Таа важеше за страстен одгледувач на тркачки коњи, но беше и голем љубител на коњичкиот спорт.
Меѓу коњите ставени на продажба се и кобили обучени од врвни тренери. Одлуката е дочекана како изненадување, но портпаролот на Tattersalls, Џими Џорџ, вели дека не станува збор за нешто необично.
„Секоја година има продажба на коњи. Кралицата имаше свои кобили за легло, ги одгледуваше за да ги продава. Не може сите да ги чувате“, изјави тој.
За потсетување, кралицата од нејзиниот татко кралот Џорџ Шести наследи центар за одгледување коњи од кои излегоа многу победници на спортски трки.
Нејзиниот менаџер за трки Џон Ворен претходно изјави дека коњите биле нејзиното „бегство“ од другите кралски должности, како и поддршка за коњичкиот спорт.
„Сигурен сум дека ако кралицата не беше воспитана да стане монарх, таа ќе работеше со коњи. Тоа едноставно беше во нејзината ДНК“, истакна Ворен.
