Популарната песна „The Passenger“ на Иги Поп и гитаристот Рики Гардинер, снимена и објавена на албумот „Lust for Life“ на Иги од 1977 година, конечно доби видеоспот, 43 години подоцна.
Видеоспотот е во режија на Сајмон Тејлор, монтиран во Tomato Studio.
Песната беше објавена и на Б страната на единствениот сингл од албумот, „Success“. Како самостоен сингл беше објавена во март, 1998 година, кога се искачи на 22. место на британската топ листа.
Иги Поп наводно го напишал текстот за песната додека се возел со метро во Берлин. Музиката е на Гардинер. Песната е делумно базирана на поема на Џим Морисон.
Во интервју за The Guardian, Иги Поп изјави дека песната била делумно инспирирана од патувањата со Дејвид Боуви за неговата турнеја.
„Се возев низ Северна Америка и Европа во автомобилот на Дејвид. Немав ни кола, ни возачка“, се присетува Иги.
Песната „The Passenger“ доби култен рокенрол статус и била употребена во бројни филмови, видеоигри, документарци и ТВ-шоуа, вклучувајќи ги „He Died with a Felafel in His Hand“, „This Must Be the Place“, „Radiofreccia“, „30 Days“, „Jarhead“ и Pro BMX 2, а во поново време во „Up in the Air“, „The Weather Man“, „Kurt Cobain: About a Son“, „Scarface: The World Is Yours“, „24 Hour Party People“, „If I Stay“, „Sons of Anarchy“, „War Dogs“ , „Ash vs Evil Dead“, „12 Monkeys“, „Berlin Station“ (Сезона 3, епизода 1), „The Boys“, како и во петтата сезона од „Anthony Bourdain: Parts Unknown“ и филмот „Waking Life“.
