Лаутаро Мартинес, напаѓачот на Интер и на аргентинската репрезентација, е разочаран од седмото место во изборот за Златната топка за сезоната 2023/2024. Пред него беа Родри, Винисиус, Белингам, Карвахал, Халанд и Мбапе.
„Немам на што да им завидувам на Халанд, Мбапе, Кејн и Левандовски. На нивното ниво сум. Разочаран сум само од седмото место и очекував повисок пласман по одличната сезона што ја имав“, изјави Лаутаро.
Во текот на сезоната 2023/2024 ја освои италијанската титула со Интер, а јужноамериканската титула со Аргентина, придонесувајќи за споменатите трофеи како најдобар стрелец и во натпреварувањата во Серија А и во Копа Америка.
На страната на Лаутаро е и неговиот капитен Лионел Меси: „Лаутаро ја заслужува Златната топка повеќе од било кој бидејќи имаше одлична сезона“.
Хавиер Занети, сонародникот на Мартинес и легенда на Интер, додаде: „Сите очекувавме тој да биде подобро пласиран, но така е со наградите. Тие не се секогаш фер. Лаутаро мора да остане смирен бидејќи освои многу и го заслужи признанието на сите оние што играат фудбал“.
