ЛаВар Бол, таткото на ѕвездата на UCLA Лонзо Бол, стана познат по неговите фалби. Но на ЛеБрон Џејмс му дојде преку глава од него.
Лонзо без сомнение е најдобриот играч во колеџ кошарка, иако е само прва година на факултет. Но, ЛаВар е тој што постојано е во центар на вниманието со неговите фалби.
ЛаВар рече дека кога биле млади можел да го победи Мајкл Џордан на „еден на еден“.
Тој вели дека сака договор за патики вреден милијарда долари за неговите тројца синови (ЛиАнџело и ЛаМело Бол ќе му се придружат на Лонзо на UCLA). Корисниците на Twitter редовно го зафркаваат ЛаВар за неговите фалби.
Меѓутоа, неговите последни коментари го изнервираа ЛеБрон Џејмс.
„Не ми ги спомнувај децата, не ми го спомнувај семејството!“, изјави ЛеБрон вчера за ESPN.
„Ова го кажувам како татко на друг татко. Сега веќе станува проблем.“
Причината за ваквата реакција е што ЛаВар ги спомна синовите на ЛеБрон, 12-годишниот ЛеБрон Џејмс Џуниор и 9-годишниот Брајс Максимус Џејмс, во подкастот „In the Zone with Chris Broussard“.
„Земете го ЛеБрон за пример. Ќе им биде многу тешко на неговите деца, бидејќи ќе им викаат ‘мора да бидеш како татко ти’. По некое време, расте притисокот и ќе си помислат ‘зошто да бидам како него, зошто не можам да бидам свој?’ Ќе наидуваат на критики, зошто очекувањата се многу високи“, рече ЛаВар во подкастот.
ЛеБрон на неговата реакција додаде: „Може да зборува за својот бренд, за своите синови, за кошарка, за мене. Ама семејството нека не ми го спомнува.“
