Американците кои порано возеле „југо“, велат дека овој југословенски автомобил никогаш и не бил толку лош, колку што имал лоша репутација.
Некогаш еден од најевтините и најомразените модели што некогаш ги возеле Американците, „југото“ сега станува колекционерски автомобил во САД.
Сопствениците на најпознатиот југословенски автомобил зборуваа за New York Times, а искуствата се изненадувачки позитивни!
„Ќе најдете луѓе кои го сакаат југото поради неговата опскурност, само за да поседуваат нешто што другите не го сакаат“, вели Валери Хансен, која го реставрира моделот од 1984 година увезен во САД.
Една од причините зошто некои сопственици го засакаа е тоа што може да се поправи „со стап и јаже“, и тоа е добро, бидејќи на „југото“ му треба редовно механичарско внимание.
Покрај тоа, некои веруваат дека автомобилот не заслужува шеги и критики.
„Секогаш ќе имам впечаток дека Џеј Лено лично го ‘уби’ овој автомобил. Никој не сака да поседува нешто што е предмет на потсмев“, објасни Стив Москович, поранешен продавач на моделот „југо“.
„Лено редовно се потсмеваше на малиот хечбек на неговото шоу“, вели тој.
Сепак, факт што често се заборава е дека Zastava добро пројде во својата земја. Произведени се скоро 800.000 примероци на „југо“, а беа понудени повеќе од 10 различни верзии.
Покрај тоа, малиот хечбек ја надживеа Југославија, останувајќи на производствената линија до 2008 година. Во земјите кои се појавија од пепелта на поранешната заедничка држава, „југо“ е сè уште вообичаена глетка.
Јасно е дека тоа не беше автомобил со врвен квалитет, но никогаш не беше насочен кон премиум сегментот.
Пропадна во Америка, бидејќи никогаш не беше дизајниран за 12-часовно патување низ пустините во Тексас, исто како и оригиналното Mini, кое кратко време се продаваше во САД од истата причина.
Гордите возачи кои ги споделија своите искуства во New York Times едногласно се согласија дека „југо“ никогаш не било толку лошо, колку што имаше лоша репутација.
Во последно време, неговата вредност во САД дури започна да расте. Минатата година, еден примерок од 1988 година беше продаден на аукциската платформа Cars & Bids за 6.100 американски долари (5.000 евра).
