Пилотот на Ферари, Шарл Леклер му се извини на тимскиот колега Себастијан Фетел за вчерашниот инцидент во трката од Формула 1 шампионатот во Австрија. Фетел, пак, изјави дека не очекувал обид за претекнување од неговиот колега.
„Разочаран сум од себеси. Не можам да опишам со зборови колку е срамно. Направив недопустива грешка. Ја уништив седумдневната напорна работа на целиот тим. Бев нестрплив во желбата да напредувам од самиот почеток. Ќе ја научам лекцијата од оваа грешка“, стои во извинувањето на Леклер.
По судирот во првиот круг, двајцата пилоти на Ферари беа принудени предвремено да ја завршат трката.
„Бев изненаден, не очекував Леклер да се обиде да ме престигне. Автомобилот овој пат беше многу подобар од пред една недела, па штета е што не бевме во можност да го провериме нашето тркачко темпо и нашите ажурирања“, изјави Фетел кој настрада ни крив ни должен.
На Големата награда на Австрија, втора по ред во оваа корона сезона, синоќа триумфираше Луис Хамилтон од Мерцедес, втор беше неговиот колега Валтери Ботас, а како трет на подиумот заврши Макс Верстапен од Ред Бул.