Баерн го совлада Ајнтрахт со 5:2 во последниот вчерашен дуел од 27. коло во Бундеслигата. Баварците ја вратија предноста од четири бода во однос на второпласираната Борусија од Дортмунд.
Еден од головите за Баерн го постигна незапирливиот Роберт Левандовски. Тоа беше слатко-горчлив момент: трибините празни, а честитките на голот „со лакт“. Така ќе изгледа прославата во време на пандемија.
31-годишниот напаѓач во 46. минута го совлада гостинскиот голман и ја продолжи серијата од пет средби на кои постигна погодок. Претходно ја затресе мрежата на Келн, Унион и Падерборн (2 гола) во Бундеслигата, а во меѓувреме и на Челси во Лигата на шампионите.
Левандовски оваа сезона има 27 гола во Бундеслигата и заедно со напаѓачот на Лацио, Чиро Имобиле, го предводи списокот на најдобри стрелци во најдобрите пет лиги во Европа.
Покрај 27 гола во германскиот шампионат, полскиот фудбалер постигна 11 во ЛШ и три во германскиот Куп.
Левандовски постигнува 40 или повеќе голови за Баерн петта година по ред. Тој го направи најдобриот резултат во сезоната 2016/17 кога постигна 43 голови.