Фудбалерите на Полска ја победија Саудиска Арабија со 2:0 во второто коло на Светското првенство во Катар и со тоа целосно ја искомплицираа ситуацијата во групата Ц.
Од почетокот на натпреварот се играше грубо, па бразилскиот судија до 20. минута додели дури четири жолти картони.
Репрезентацијата на Полска стигна до првата победа на Светското првенство во Катар откако славеше со резултат од 2:0 против Саудиска Арабија. Со денешната победа Полска е на добар пат да обезбеди место во осминафиналето со оглед на тоа што стигна до четвртиот бод.
Саудиска Арабија прикажа уште една одлична партија, го имаше поседот на топката, упати двојно повеќе удари од противникот, но Полска се радуваше на победа и три бода.
Роберт Левандовски го постигна својот прв гол на Светско првенство.
Со денешната победа Полска го зазеде првото место во групата Ц. Полјаците имаат четири бода, а Саудијците три бода. Преостанатиот натпревар од второто коло во групата Ц го играат Мексико (еден освоен бод) и Аргентина (без бодови).
Во последното коло Полска ќе игра против Аргентина, а Саудиска Арабија со Мексико.