Ова го тврди поранешниот агент на полскиот голгетер, Цезариј Кухарски.
Фудбалерот на Баерн, Роберт Левандовски, инсистира да се пресели во Барселона, бидејќи сака да докаже дека е подобар напаѓач од центарфорот на Реал, Карим Бензема, изјави поранешниот менаџер на полскиот репрезентативец, Цезариј Кухарски, пренесуваат шпанските медиуми.
Тој повтори дека Левандовски по секоја цена сака да го напушти Баерн.
„Тој сака да докаже дека е подобар од Бензема, а тоа е само уште една причина зошто се одлучи за Барселона. Тоа ќе може да го направи само ако игра во истата лига со напаѓачот на Реал Мадрид. Левандовски нема соништа, бидејќи за него фудбалот е работа, а Роберт е многу професионален. Реал и Барселона се клубови кои се на исто ниво“, изјави Кухарски за најпознатото шпанско радио, Cadena SER.
Тој беше агент на полскиот напаѓач до 2018 година, а потоа Левандовски реши да соработува со Пини Захави.
„Барселона и Левандовски ќе се борат да ја завршат работата. Менаџерите на Баерн знаат дека тој сака да замине во Шпанија. Неговиот план беше да замине од Германија во Шпанија, а потоа да ја заврши кариерата во американската МЛС лига“, додаде Кухарски.
Шпанските медиуми потсетуваат дека се водат преговори меѓу челниците на Барселона и Баерн, дека Каталонците се подготвени да дадат 50 милиони евра за полскиот напаѓач, додека Баерн бара 10 милиони повеќе.
