По две години од поднесената Иницијатива пред Уставниот суд против Законот за двојазичност, кој беше прогласен без указ на Претседателот на Републиката, Судот за утре закажа подготвителна седница.
„По повеќе од две години од поднесената Иницијатива пред Уставниот суд на РМ против т.н. Закон за двојазичност, кој беше прогласен без указ на Претседателот на Републиката - Уставниот суд нѐ кани на подготвителна седница, која ќе се одржи утре (четврток, 18 март 2021 година), со почеток во 10:00 часот, во просториите на судот, а на која ќе присуствува и претседателот на Левица, проф. д-р Димитар Апасиев“, соопштија од опозициската партија.
Левица на Уставен суд го оспори овој закон поради тоа што, како што велат, беше објавен без потпис на претседателот на државата туку со потпис на претседателот ан Собранието, Талат Џафери, што е противуставно.
Пред ланските избори Левица поднесе и кривична пријава за саботажа против поранешниот претседател на Уставниот суд, Никола Ивановски „заради неосновано чување на предметот во фиока, со што свесно се предизвикани тешко отстранливи последици по уставниот поредок на државата, затоа што овој т.н. закон почна да се применува од институциите, без никаков правен основ за тоа“.
„Укажуваме дека доколку се воспостави пракса законите да влегуваат во сила без неопходниот претседателски потпис, каква што е евидентната намера на Уставниот суд, Македонија ќе заплови во сосем непосакувани и непредвидливи води, од аспект на идни злонамерни повреди на начелото на поделба на власта и владеењето на правото.
Нормализацијата на овој штетен преседан ќе значи одврзани раце на секоја идна власт, надвор од Уставот, комплетно да го игнорира шефот на државата и целосно да го поткопа воспоставениот правен поредок“, неведуваат од Левица за причините поради кои го спорат овој закон.
„Апелираме уставните судии, барем еднаш во својата кариера, да станат вистински 'чувари на Уставот' и да го надминат својот сервилен однос кон властодршците, носејќи ја единствената правилна мериторна одлука со која ќе го поништат овој екстремно штетен 'закон' кој, според зборовите и на домашната и на европската стручна јавност, комплетно ја парализираше Републиката со својот етно-трибалистички концепт, кој десеткратно го пробива и т.н. Рамковен договор“.
УСТАВНИОТ СУД ЗАКАЖА СЕДНИЦА ЗА „ЗАКОНОТ ЗА ДВОЈАЗИЧНОСТ“, ОБЈАВЕН ОД ЏАФЕРИ БЕЗ ПОТПИС НА ПРЕТСЕДАТЕЛОТ По повеќе од...
Posted by Левица on Wednesday, March 17, 2021