Откако со само 16 гласови „за“ не помина нивниот Предлог-закон за укинување на апанажата на министрите, Левица најави дека ќе поднесе Предлог-закон за работниците да ги добијат истите тие права кои ги добиваат јавните функционери.
„Пратениците на Левица, како единствена автентична партија на трудот, која ги штити интересите на работниците, до Собранието на Република Македонија ќе поднесат Предлог-закон за изменување на Законот за вработување и осигурување во случај на невработеност, со кој ќе се овозможи обичниот работник да зема месечен паричен надоместок за време на привремена невработеност под еднакви услови како и т.н. апанажа, која им следува како КЛАСНА ПРИВИЛЕГИЈА на избраните и именуваните лица, т.е. на јавните функционери во државава“, објави партијата.
Тие признаваат дека ваквиот чекор е знак на револт поради неприфаќањето на нивниот Предлог-закон за укинување на апанажата.
„На ваков чекор се одлучивме предизвикани од вчерашното неподдржување од страна на пратениците на Предлог-законот, поднесен од Левица, за укинување на апанажата на функционерите. Таквото дејстување на, условно кажано, најголемите политички партии, е само продолжение на статус-квото, а против начелото на социјална правда“.
„Дополнително, тоа нивно дејстување е недржавничко и претставува доказ дека за нив правата на обичниот работник за достоинствен живот се безвредни и единствена нивна партиска заложба е директна заштита на капиталот и привилегиите на мала група неспособни функционери“.
Левица побара и поддршка од работничките синдикати за овој Предлог-закон.
„Упатуваме апел до работниците и до синдикатите, јавно и отворено да го поддржат овој наш Предлог-закон и сметаме дека неговото поднесување е во насока на доследно почитување на уставното начело на забрана на дискриминација врз основа на имотна, социјална и општествената положба“.