Двајцата пратеници на Левица денеска поднесоа Барање до претседателот на државата, Стево Пендаровски, да го употреби своето уставно право на суспензивно вето и да не го потпишува Указот за прогласување на Законот за решавање на спорот помеѓу Владата и „Макпетрол“.
„Пратениците на Левица, Димитар Апасиев и Борислав Крмов, денес поднесоа Барање до претседателот на државата, Стево Пендаровски, како еден од носителите на извршната власт, да го употреби своето уставно право на суспензивно вето, гарантирано во чл. 75, ст. 3 од Уставот на РМ (1991), и да не го потпишува Указот за прогласување на Законот за решавање на спорот помеѓу Владата на Република Македонија и Макпетрол АД Скопје по пат на спогодба, кој беше донесен на ден 28.12.2020 година – по скратена постапка“, известија од партијата.
Тие ги наведоа и ги објаснија причините поради кои се решиле на ваков чекор:
(1) Законот е спротивен на Амандманот XXV од Уставот на РМ, кој вели дека судската власт ја вршат судовите и дека се забранети вонредни судови – при што, во случајов, парламентот е ставен во позиција на 'преки суд' кој, по брза постапка, решава судски спор кој трае над 15 години – со закон, надвор од своите уставни надлежности, што е без преседан во досегашната државно-правна историја на Македонија, од АСНОМ до денес;
(2) Законот е привилегирачки и е спротивен на чл. 55 од Уставот на РМ, бидејќи воведува партикуларен режим на решавање стопански спорови меѓу една приватна компанија и државата, спротивно на уставно загарантираната 'еднаква правна положба на сите субјекти на пазарот';
(3) Станува збор за исклучително штетен и сомнителен закон, кој е спротивен на јавниот интерес, бидејќи за стар и амортизиран гасовод, кој има номинална вредност од околу 18 милиони евра, државата ќе треба да исплати скоро 33 милиони евра – и тоа во време на економска и здравствена криза од сериозни размери.
„Поради горенаведеново, искрено се надеваме дека претседателот Пендаровски ќе ги искористи уставните ингеренции и нема да го потпише овој контроверзен Закон, за коj пратениците дебатираа цели 22 часа без прекин, на една од најдолгите маратонски пленарни седници во поновата парламентарна историја на Македонија“, стои во соопштението.