Најдобриот фудбалер во историјата на Финска и легенда на Ајакс, денес има 49 години и досега се бореше со коронавирусот откако се зарази пред неколку недели.
Славниот голгетер во интервју за Unibet опиша со какви проблеми се соочил поради заразата со COVID-19.
„Имав температура, главоболка и болка во мускулите. На моменти останував без здив, сѐ ме мачеше. Четири недели имав корона и уште не сум докрај опоравен“, вели тој.
Јари Литманен девет години беше дел од Ајакс за кој на 259 натпревари постигна 136 голови.
„Среќа што симптомите никогаш не беа многу силни па не морав да одам во болница. Успеав да се опоравам дома. Никогаш не сум бил во толку лоша состојба како сега“, заврши Финецот.
Со Ајакс 5 пати стана шампион на Холандија, 3 пати ги освои КНВБ купот и холандскиот Суперкуп, а еднаш триумфираше во Лигата на шампиони, УЕФА Суперкупот и Интерконтиненталниот куп.
Играше и за Барса и Ливерпул, а со англискиот клуб во една сезона освои ФА куп, Лига куп, УЕФА куп, УЕФА Суперкуп и англиски Суперкуп.
За репрезентацијата на Финска на 137 натпревари постигна 32 гола, но никогаш немаше квалитетни соиграчи па затоа и не настапи на големо натпреварување.
