Конечно на сонот „Црвените“ дојде до најслаткиот дел, до крајот, кога капитенот Џордан Хендерсон го крена пехар за шампион на Премиер лигата.
За жал, поради коронавирусот целата церемонија на примопредавањето на медалите и пехарот мина без навивачи. И во таква атмосфера, играчите на Ливерпул сепак среќни, задоволни и со насмевки на лицата го добија она кое го заслужија изминатава сезона и за кое се изборија со пот и одлична игра.
Ливерпул последен пат беше шампион на Англија во сезоната 1989/90 кога лигата носеше друго име, односно Фрст Дивижн. Стана Премиер лига по две години, почнувајќи од сезоната 1992/93. Затоа често навивачите на Ливерпул трпеа разни досетки од типот дека нивниот клуб има 0 титули шампион на Премиер лигата, што секако е неточно бидејќи Премиер лигата не е ново натпреварување туку само ново име на најстарата лига во светот, англиската. За Ливерпул овој трофеј е вкупно 19-ти.
„Црвените“ синоќа пехарот го земаа во голем стил. Со 5:3 го совладаа Челси на „Енфилд“ и тоа пет различни играчи постигнаа голови: Наби Кеита, Трент Александер-Арнолд, Џорџињо Вајналдум, Роберту Фирмину и Алекс Окслејд-Чејмбрлејн. За Челси погодија Оливје Жиру, Тими Ејбрахам и Кристијан Пулишич.
