Претседателот на Белорусија, Александар Лукашенко, денеска изјави дека е убеден дека Западот ги финансира уличните протести и нереди во земјата.
На седницата на белорускиот Совет за безбедност тој ги повика лидерите на западните земји кои денеска имаат вонреден состанок за ситуацијата во Белорусија, да си ги решат прво проблемите во своите земји.
„Би сакал да ги посоветувам: пред да го вперат прстот во нас, треба на агендата на своите состаноци да ги стават прашањата за Жолтите елеци во Франција и за ужасните нереди во САД. Сакам прво да ги разгледаат протестите против мерките за изолација поради коронавирусот во Германија и други европски земји“, рече Лукашенко.
Претседателот денеска исто така издаде наредба Министерството за внатрешни работи да стави крај на немирите во Минск што избувнаа по претседателските избори одржани на 9 август.
Според белоруската новинска агенција БЕЛТА, Лукашенко истакнал дека на медиумските работници од државните медиуми кои избраа да се приклучат на протестите не треба да им се дозволи да се вратат на работа.
Исто така, Лукашенко нареди зајакнување на безбедноста на границата со цел да се спречи влез на „борци и оружје“ во земјата.
Вонредниот самит на Европската Унија за кризата во Белорусија почна денеска напладне. Претседателот на Европскиот совет, Шарл Мишел, свика итна видеоконференциска средба на лидерите на Европската Унија за Белорусија, каде протестите траат веќе 11 дена од реизборот на претседателот Александар Лукашенко.
На самитот ќе се разговара за продолжување на санкциите против белоруските функционери, откако во петокот беше одобрено санкционирање по спорните претседателски избори.
Европските лидери вчера го повикаа рускиот претседател Владимир Путин да изврши притисок врз Лукашенко, кому му е клучен сојузник, да влезе во дијалог со опозицијата. Во одделни телефонски разговори со Путин ова го побараа францускиот претседател Емануел Макрон, германската канцеларка Ангела Меркел и претседателот на Европскиот совет Шарл Мишел.
На изборите на 9 август Лукашенко беше избран за претседател на Белорусија по шести пат, освојувајќи, како што покажуваат официјалните резултати, 80 проценти од гласовите, а кандидатката за опозиција Светлана Тихановска 10 проценти.
Веднаш по објавувањето на првите изборни резултати, започнаа масовни демонстрации низ целата земја, во кои граѓаните бараат заминување на Лукашенко, кој со земјата владее веќе 26 години.