Домот на Петра Еклстон во Лондон моментално е најатрактивната куќа на пазарот за недвижнини.
Величествената историска куќа, позната како Sloane House, потекнува од крајот на 18 век, сместена меѓу ексклузивните лондонски квартови Кенсингтон и Челзи. Имајќи на ум модерен луксуз, Еклстон ја купи куќата во 2010 година со нејзиниот тогашен сопруг Џејмс Стант, а скоро 5 години работеше со компанијата Casa Forma на обнова и преуредување на домот.
„Копавме дури 15 метри длабоко“, откри Еклстон и додава дека се градело и горе и доле за да има на имотот се што и е потребно. Така, во новиот подрум има затворен базен, теретана, спа центар, салон, игротека, терени за сквош и домашно кино.
Во текот на пандемијата, Еклстон заедно со четирите деца и свршеникот Сем Палмер престојуваше токму во оваа куќа, уживајќи во секој нејзин дел.
„Имавме многу среќа, искрено тоа веројатно ни беше најомиленото време минато заедно до таа мера што поради поврзаноста со децата, тешко ни е да се откажеме од неа“, вели Палмер кој е агент за недвижнини.
Сепак, нивниот нов дом е во Брентвуд, Лос Анџелес, а домот во Лондон е ставен на продажба. Куќата е купена за повеќе од 80 милиони долари, но за дополнителни 34 милиони е обновена. За новата верзија на Sloane House богатата наследничка на шефот на Формула 1 ќе бара најмалку 175 милиони фунти.